Иранда кармалган британиялык жарандар Назанин Загари-Рэтклифф менен Ануше Ашури 17-марттын таңында Лондонго кайтып келди. Алар Британиянын Куралдуу күчтөрүнүн атайын учагында аскердик базага конушту.
Загари-Рэтклифф менен Ашурини үй-бүлө мүчөлөрү кучактап, ыйлап-сыктап тосуп алышты.
Премьер-министр Борис Жонсон 16-мартта Твиттерге жазган постунда Загари-Рэтклифф менен Ашуринин “мыйзамсыз кармалышы” аяктаганын, алар Британияга кайтышарын жазган эле.
Thomson Reuters Foundation фондунун менежери, Назанин Загари-Рэтклифф айым 2016-жылдын апрелинде кызы менен Британияга кайтып баратканда, Тегеран аба майданында кармалган. Ал “Иран өкмөтүн төңкөрүү боюнча кутумга катышкан” деп айыпталып, беш жылга түрмөгө кесилген. Анын үй-бүлөсү жана фонд бул айыптарды четке каккан. Amnesty International уюму Загари-Рэтклифф айымдын сот ишин “өтө адилетсиз” деп мүнөздөгөн.
Назанин Загари-Рэтклифф Британия менен Ирандын жараны.
Ануше Ашури 2019-жылы кармалып, 10 жылга кесилген. Ага Израилдин чалгын кызматына тыңчылык кылган деген айып тагылган. Amnesty International Ашуринин кармалышын мыйзамсыз деп айыптап, ал кыйноого кабылганын билдирген.
Загари-Рэтклифф менен Ашурини бошотуу Ирандын өзөктүк программасы боюнча Батыш өлкөлөрү менен Тегерандын сүйлөшүүлөрүнүн жүрүшүндө макулдашылганы кабарланды. АКШ, Британия жана башка өлкөлөр катышып жаткан бул сүйлөшүүнүн өзүндө жыйынтык чыга элек. (ErN)
