Президент Садыр Жапаров 14-мартта өлкөнүн коопсуздугун камсыздоо маселелери боюнча жумушчу кеңешме өткөрдү. Бул тууралуу президенттик администрациянын басма сөз кызматы билдирди.
Кеңешмеде дүйнөдө түзүлгөн кырдаалдан улам келип чыккан маселелер, анын социалдык-экономикалык таасири, өлкөнүн аймагындагы эпидемиологиялык кырдаалды мындан ары турукташтыруу маселелери каралды.
Орусия 24-февралда Украинада согуш баштагандан бери доллар кескин кымбаттап, Орусияга карата катаал экономикалык санкциялар киргизилүүдө. Анын таасири Кыргызстанга да тийип өлкөдө бир доллар 103-106 сомго чыкты.
Орус өкмөтү Евразия экономикалык биримдигине мүчө өлкөлөргө дан азыктарын жана кумшекерди экспорттоого 31-августка чейин тыюу салды. Кыргызстанда эл биринчи керектеген айрым-азык түлүктүн, анын ичинде ун, кумшекер, өсүмдүк майынын баасы кымбаттаганы байкалды. (BTo)
