Жалал-Абад облустук ички иштер башкармалыгы Ала-Бука районунда алтын казган компанияны тоноого шек саналып үч адам колго түшкөнүн билдирди.
Милициянын маалыматына караганда, окуя былтыр 12-ноябрга караган түнү болгон. Анда беткап, мээлей кийген белгисиз адамдар компаниянын кызматкерлерин, чет өлкөлүк жана жергиликтүү жарандарды уруп-сабап, 20 миң сомун, сейфте сакталып турган эки килограммдай алтынды алып кетишкен. Ошондой эле короодо турган машинелерди талкалашкан.
Тергөөдө материалдык чыгымдын көлөмү 10 миллион сомдон ашты деп эсептелген. Учурда тергеп-иликтөө уланууда.
Милиция кайсы компания каракталганы тууралуу азырынча маалымат бере элек.
Жалал-Абад облусунда жалпысынан кен казууга 500гө чукул лицензия берилген. Учурда аймакта алты компания алтын казып жатат. (TB)
