АКШ президенти Жо Байден “Бухарест тогуздугу” же НАТОнун чыгыш флангындагы өлкөлөрдүн лидерлери менен орус-украин чек арасындагы кырдаал боюнча сүйлөшүүлөрдү жүргүздү.
АКШ президенти менен Болгария, Чехия, Эстония, Венгрия, Латвия, Литва, Польша, Румыния жана Словакиянын лидерлери “Орусия Украина менен чек арасында аскер кубатын күчөтүүсү жана НАТОнун бирдиктүү, чечкиндүү даярдыгы " боюнча союздаштардын жамааттык коргонуу позициясын талкуулашты.
Бул сүйлөшүүлөрдүн жыйынтыгы тууралуу Ак үй маалымат таратты.
АКШ президенти Жо Байден украин президенти Владимир Зеленский менен 9-декабрда телефондон сүйлөшкөндөн кийин Москва Украинанын НАТОго кошулуусуна катуу каршы болгонуна карабастан, аскердик союзга кирүү Украинанын өзүнө гана тиешелүү маселе экенин билдирди.
Бирок, Ак үйдүн басма сөз катчысы Жен Псаки брифингде айткандай, бул үчүн Украина бир катар шарттарга шайкеш келиши керек. Анын ичинде ал аскердик блокко мүчөлүккө кирүүдөн мурун коррупцияга каршы күрөш жана экономика боюнча бир топ чараларды аткарууга милдеттүү.
"Ал эми кийинки чечим кандай болору НАТОдон жана анын өнөктөштөрүнөн көз каранды", - деди америкалык администрациянын өкүлү.
Буга чейин АКШнын президенти Жо Байден Орусия менен АКШнын НАТОдогу төрт союздашы катыша турган жолугушуу пландалып жатканын билдирген. Ал кайсы мамлекеттер экени такталган жок.
АКШ президентинин айтымында, бул сүйлөшүүнүн максаты Орусиянын НАТОнун чыгышка карай кеңейишине тынчсыздануусун жана чөлкөмдөгү чыңалууну жөнгө салуучу келишимдерге жетишүү. НАТОнун кээ бир мүчөлөрү Байдендин Орусия менен диалогго даярдыгын дипломатиялык жеңилдөө аракети деп эсептешет.
Эстониянын премьер-министри Кая Каллас Орусиянын НАТОнун ичинде кабыл алына турган чечимдерге кийлигишүүсүнө жол бербөө керектигин билдирди. Анын айтымында, Москва коркутуулардын жана аскерий күчтөрдүн кысымы астында "Европаны ар кайсы таасир чөйрөсүнө бөлүүнү" каалайт.
АКШ жана анын НАТОдогу союздаштары Орусия Украина менен чек арага жакын жерлерде он миңдеген аскерлерин топтогону тууралуу кабарларга тынчсыздануусун билдиришти. Москва Украинага басып кирүүгө даярданууда деген жоромолду кескин четке кагат.
