Орусиянын Эл артисти Александр Градский 72 жашында көз жумду. Бул тууралуу 28-ноябрда "Известия" басылмасына таянып, ТАСС агенттиги кабарлады.
26-ноябрда ырчы инсультка шектелип ооруканага жеткирилген. Эки күн бою ал оор абалда реанимацияда жатканы кабарланды. Ал мурда коронавирустан ооруп айыккан.
Александр Градский 1949-жылы 3-ноябрда Орусиянын Челябинск облусунда туулган. Ал ырчы, музыка жаратуучу, акын жана орус рок-музыкасынын негиздөөчүлөрүнүн бири катары коомчулукка белгилүү.
Кийинчерээк “Александр Градскийдин хит-парады” аттуу автордук радиопрограммасы менен чыгып, Юрий Шевчуктун, Виктор Цойдун, Александр Башлачевдин жана башка көптөгөн ушул жанрдын өкүлдөрүнүн чыгармалары менен кеңири аудиторияны тааныштырган. Градский бир катар советтик рок-фестивалдарды уюштурууга да катышкан.
1970-жылдары Градский көркөм тасмаларга музыка жаза баштаган. Ал отуздан ашык көркөм, документалдык жана анимациялык фильмдердин музыкасынын автору.
2012-жылдан бери Градский жаш таланттар үчүн популярдуу "Голос" теледолбоорундагы насаатчылардын бири болгон. Ырчынын тарбиялануучулары дайыма шоунун жеңүүчүлөрү болушкан. 2014-жылы Градский Москвада өзүнүн музыкалык театрын ачкан.
