Баткен облусун өнүктүрүү фонду түзүлүп, ага жыл сайын жарым миллиард сом которулуп турат. Бул тууралуу 13-октябрда парламентте өкмөттүн сунушталган жаңы курамы каралып жатканда Министрлер кабинетинин төрагасынын милдетин аткаруучу Акылбек Жапаров билдирди.
Жапаров “Баткен облусу кандай болуп өзгөрөрүн эки-үч жылда көрө аласыңар” деди:
“Сиздердин тапшырмаңыздар менен жакынкы арада Баткендин өнүктүрүү фонду болот. Жыл сайын 500 миллион сом бөлүп турабыз. Мындан тышкары чет мамлекеттерден, эл аралык финансылык институттардан, баарынан сурандык. Жакынкы 5-10 жыл ичинде Баткен жана Нарын облусуна болгон финансылык мүмкүнчүлүктөрдү жумшайбыз. Баткен биздин эң алыскы эмес, Кыргызстан баштала турган облусубуз. Баткенге түздөн-түз көңүл бурабыз. Эки-үч жыл ичинде Баткен облусу кандай болуп өзгөргөнүн көрөсүздөр”.
Баткен облусу борбордон эң алыс жайгашкан, Кыргызстандын Тажикстан жана Өзбекстан менен чектешкен тилкесиндеги аймак. Коңшулар менен чек ара такталып бүтө элек болгондуктан жер, суу талаш маселелери утур катталып турат. Быйыл жазында кыргыз-тажик чек арасындагы куралдуу кагылышта 36 кыргыз, 19 тажик жараны көз жумган. Жүздөгөн үйлөр, социалдык объектилер талкаланган. (RK)
