Кыргызстандык балбан Айсулуу Тыныбекова Норвегиянын Осло шаарында өтүп жаткан кыз-келиндер күрөшү боюнча Дүйнө чемпионатынын финалына чыкты. Биргелешкен күрөш дүйнөсү уюмунун расмий сайтындагы маалыматка таянсак, Тыныбекова 4-октябрда 62 килограмм салмакта жарым финалда украиналык Илона Прокопевнюк менен күрөшүп, 5:2 эсебинде жеңишке жетти.
Айсулуу Тыныбекова бул Дүйнө чемпионатында жарым финалга чейин эки беттеш өткөрдү. Алгач 1/8 финалда жапониялык Нонока Озакини 6:4 эсебинде, чейрек финалда белорусиялык Вераника Иванованы 6:6 эсебинде жеңип алган. Эми 5-октябрда алтын байге үчүн АКШ өкүлү Кайла Колиин Кийоко Миракл менен күрөшөт.
28 жаштагы Айсулуу Тыныбекова буга чейин кыз-келиндер күрөшү боюнча Дүйнө чемпионатынын алтын жана коло медалдарын уткан. Токиодо өткөн Олимп оюндарында күмүш медал тагынган. Азиянын төрт жолку чемпиону.
Бүгүн, 4-октябрда Айсулуу Тыныбековадан сырткары дагы бир кыргызстандык балбан Эрназар Акматалиев финалда күрөшүүгө мүмкүнчүлүк алды. Ал эркин күрөштөн 70 килограмм салмакта жарым финалда орусиялык Евгений Жербаевди 9:5 эсебинде жеңип, алтын байге үчүн күрөшүүгө укук алды. Финалдык беттештер Бишкек убактысы боюнча саат 22:00дө башталат.
Эркин күрөштөн 65 килограмм салмакта Алибек Осмонов бүгүн, 4-октябрда дүйнө чемпионатынын коло байгеси үчүн польшалык Кристов Биенковски менен күрөшөт. Беттеш Бишкек убактысы боюнча саат 22:00дө башталат.
Норвегияда 2-октябрда башталган күрөш боюнча дүйнө чемпионаты 10-октябрга чейин уланат. Ага Кыргызстандын кыз-келиндер, эркин жана грек-рим күрөшү боюнча курама командасынан жалпы 15 балбан катышууда.
