Орусиянын "Россельхознадзор" мекемеси Түркиядан алынып келинген мөмө-жемиштерден коркунучтуу монилиоз жана помидордон вирус табылганын кабарлады.
23-сентябрда мекеменин өкүлдөрү Түркиянын Айыл жана токой чарба министрлигинин Азык-түлүк башкармалыгы менен сүйлөшүүлөрдү жүргүздү.
Орус бийлиги "продукциянын фитосанитардык коопсуздугун жогорулатууну" талап кылды. "Россельхознадзор" Түркиядан ташылып келген жашылча-жемиштерде пестициддердин деңгээли жогору экенин белгилеген.
Бул маалыматтар Орусия менен Түркиянын лидерлеринин жолугушуусуна бир нече күн калганда пайда болду. 29-сентябрда Владимир Путин менен Режеп Тайып Эрдоган Сочиде жолугуп, сүйлөшүүлөрдү өткөрөрү айтылган. Түрк президенти сүйлөшүүлөрдүн темасы Сириядагы абал жана эки тараптуу мамиле болорун айткан.
Режеп Тайып Эрдоган 22-сентябрда Бириккен Улуттар Уюмунун 76-Башкы Ассамблеясында сөз сүйлөп, Крым аннексиясын тааныбай турганын жана Украинанын аймактык бүтүндүгү менен эгемендигин коргоо маанилүү экенин айткан.
20-сентябрда Түркиянын Тышкы иштер министрлиги Крым аймагында Мамлекеттик Думага болгон шайлоонун жыйынтыгын тааныбай турганын билдирген.
Орусия ар кайсы өлкөдөн тамак-аш ташып келүүгө бир нече жолу чектөө киргизген жана жана муну тышкы саясаттын куралы катары колдонот.
2014 -жылы Евробиримдик Крымды аннексиялап алганына байланыштуу Орусияга каршы санкцияларды киргизген. Орусия буга жооп иретинде биримдиктин өнүмдөрүнө тыюу салган. Башында санкция бир жылга киргизилип, кийин узартылган.
