Министрлер кабинетинин төрагасы Улукбек Марипов Кыргызстан менен Түркиянын ортосундагы товар жүгүртүүнү 1 миллиард долларга жеткирүү үчүн аракет кылуу керектигин билдирди.
Бул тууралуу ал 10-сентябрда Кыргызстанда Түркиянын вице-президенти Фуат Октай менен жолугушууда айтканын Министрлер кабинетинин басма сөз кызматы кабарлады.
“Келечектүү орто жана чакан долбоорлорду ишке ашыруу үчүн инвестициялык фонд түзүүнү сунуштайбыз”, – деди Марипов.
Фуат Октай эки өлкөнүн ортосундагы товар жүгүртүү көлөмүн 1 миллиард долларга жеткирүүнү колдоп, Түркия Кыргызстанга инвестиция тартууга даяр экенин кошумчалады.
Жолугушууда Түркиянын ооруканаларында акысыз негизде 150 кыргызстандыкты дарылоо үчүн ар жылкы квоталарды берүүнү жаңыртуу маселеси да каралды.
Октай 10-сентябрда Бишкекте өтө турган соода-экономикалык кызматташтык боюнча кыргыз-түрк өкмөттөр аралык комиссиясынын 10-кеңешмесине катышат. Ушул күндөрү баш калаада кыргыз-түрк бизнес-форуму да өтөт.
Сапар алкагында бир катар документтерге кол коюу жана "Маариф" мектебинин ачылышы пландалууда. (BTo)
