28-августта Казакстанда коронавирус жугузгандардын саны 5222ге жетти. Коңшу өлкөдө COVID-19ун “дельта” штаммы тездик менен жайылып, аны жугузуп алган жаштар катуу ооруп жатканы маалым болду. Түркестан облусунан башка бардык аймактар “кызыл зонага” кирди.
30-августка карай вируска чалдыкканы лабораторияда тастыкталгандардын саны 785 149 бейтапка жетти. Былтыр 13-мартта коронавирус биринчи катталгандан бери инфекциядан өлгөндөрдүн саны 9 222ге жетти. Бир күндө 104 киши көз жумганы катталды.
Казакстандын Саламаттык сактоо министрлигинин маалыматына ылайык, 30-августка карай коронавируска каршы эмделгендер 5,33 миллионго жетти. Ал эми вакцинанын 1-дозасын алгандардын саны – 6,61 миллион.
Коңшу өлкөдө элди эмдөөгө Карагандыда өндүрүлгөн орусиялык ««Спутник V» вакцинасы колдонулат. Ошондой эле жергиликтүү QazVac, Кытайдын CoronaVac жана Бириккен Араб Эмираттарында чыгарылган, кытайлыктар ойлоп тапкан Hayat-Vax вакцинасын сайдырса болот.
АКШдагы Жонс Хопкинс университетинин маалымат базасы дүйнөдө 216 миллион кишиге коронавирус жукса, 4,5 миллион киши андан көз жумганын көрсөтөт.
