Министрлер кабинетинин төрагасы Улукбек Марипов Чолпон-Ата шаарында өтүп жаткан Евразия өкмөттөр аралык кеңешинин кезектеги жыйынында Ооганстандагы акыркы окуялардын тездик менен өнүгүшү аймактык коопсуздукка коркунуч туудуруп жатканын айтты. 19-августта Чолпон-Атада башталган жыйында Марипов акыркы окуялар Борбор Азия өлкөлөрүнүн коопсуздугуна таасирин тийгизиши шексиз экенин билдирди.
"Дүйнөнүн көптөгөн өлкөлөрүндө, анын катарында ЕАЭБ мамлекеттеринде табият кырсыктары көбөйүүдө. COVID-19га байланыштуу кырдаал, эмдөө, ооругандардын саны убактылуу басаңдаганына карабай кооптуу кырдаал сакталууда. Бул көйгөйлөргө каршы бирге туруп, жаңы чакырыктарды жеңип чыга аларыбызга ишенем", - деди ал.
Марипов Евразия өкмөттөр аралык кеңешинин жыйыны алкагында кабыл алынган чечимдер ЕАЭБге интеграциялашууга мыкты түрткү берерине ишенерин кошумчалады.
19-20-августта Чолпон-Ата шаарында Евразия экономикалык биримдигине (ЕАЭБ) мүчө өлкөлөрдүн өкмөт башчыларынын саммити өтүүдө.
Жыйынга Армениянын премьер-министри Никол Пашинян, Беларустун өкмөт башчысы Роман Головченко, Казакстандын премьер-министри Аскар Мамин, Орусиянын өкмөт башчысы Михаил Мишустин жана Кыргызстандын Министрлер кабинетинин төрагасы Улукбек Марипов катышууда.
Байкоочу өлкө катары Өзбекстандын өкмөт башчысы Абдулла Арипов жана онлайн байланыш аркылуу Кубанын премьер-министри Мануэль Марреро Крус катышмакчы. (BCh)
