Жалал-Абад облусунун Аксы районунда сел агызып кеткен беш жашар баланын сөөгү табылды. Маалыматты Жаңы-Жол айыл өкмөтүнүн башчысы Эламан Кочкорбаев ырастады.
Куткаруучулар бүгүн, 17-июлда саат 15:30дар чамасында Кара-Суу дарыясы менен Нарын дарыясынын кесилишинде жаш баланын сөөгүн табышкан. Кочкорбаев маркумдун сөөгүн үй-бүлөсүнө берүү үчүн алып кетишкенин кошумчалады.
Аксыда 12-июлда кечинде нөшөрдөн улам кокту-колоттон сел түшүп, сегиз кишини агызып кеткен. Алты адамдын сөөгү ошол эле күнү табылган. Эки жарым жаштагы кыздын сөөгү 14-июлда табылган. Селден каза болгон сегиз кишинин алтоо бир үй-бүлөнүн мүчөлөрү.
Алты маркумдун үй-бүлөсүнө 1 миллион 300 миң сом, ушул эле кырсыкта өмүрү кыйылган эки баланын жакындарына 150 миң сомдон берилди. Бул каражат президенттин жана Министрлер кабинетинин төрагасынын резервдик фондунан бөлүндү. (TB)
