Улуттук коопсуздук комитетинин Чек ара кызматынын маалыматына караганда, 1-май, саат 9.00гө карата Баткен облусунун аймагында абал туруктуу.
Өткөн түнү чыр-чатак жана атышуулар катталган жок.
Кооптуу делген Көк-Таш, Самаркандек, Арка-1, Арка-2 жана Борбордук айылдарында абал турукташып калды. Ош-Исфана автожолунун Жака-Өрүк тилкеси, Төрт-Көчө жолу тазаланып, ачылды. Аскер отряддары мамлекеттик чек араны кайтарып жатканы кабарланды.
28-апрелде кыргыз-тажик чек арасында чыккан чырдан кийин абал курчуп, Баткен жана Лейлек райондорунда атышуу болгон.
29-апрелде үйлөр жана имараттар өрттөлүп, 20 миңдей жай тургун эвакуацияланды.
Акыркы маалыматтарга караганда, жараат алган кыргызстандыктардын саны 154, каза болгондор 31 киши.
Тажикстандын бийлиги жабыркагандар тууралуу расмий маалымат бере элек, журналисттер 90 адам жараат алганын, 12 киши каза болгонун маалымдашты.
Баткен облустук милициясы Тажикстан менен чектеш аймактарда 1-майга караган түн тынч өткөнүн, атышуу жана башка окуялар катталбаганын билдирди.
Интернеттеги социалдык тармактарда Баткен шаарында жана Лейлек районунун чек арага жакын жайгашкан айрым айылдардын бир катар жашоочулары түндө кооптонуп, үйлөрүндө түнөбөгөнүн айтып жатышат.
