Ош-Баткен жолунун Ноокат районундагы бөлүгүн оңдоп берүүнү талап кылган тургундар нааразычылык акцияга чыгышты.
Бүгүн 20-апрелде Көк-Жар айылынын стадионунда башталган митингге жүзгө чукул жергиликтүү тургун катышып жатат. Аймактагы кабарыбыздын айтымында, азырынча аларга жергиликтүү бийлик өкүлдөрү келе элек.
Ош-Баткен жолунун Ноокат районундагы бөлүгүн оңдоо талабы менен өткөн жумада да акция уюштурулган болчу. Жолдун кейиштүү абалы тургундарды бир топ жылдан бери эле нааразы кылып келет. Бул жолго 1971-жылы асфальт төшөлгөн.
Сооронбай Жээнбеков президент кезинде аймакка барган учурда райондук жол тейлөө ишканасынын кызматкерлери жолду ылай, топурак менен жамап жатканы тартылган видео интернетке жарыяланып кеткен.
Ош-Баткен жолунун Ноокат аймагынан өткөн 45 чакырым аралыгын оңдоо үчүн Транспорт министрлиги тендер өткөргөн. Тендерди жапониялык JICA уюму утуп чыккан жана оңдоп-түзөөгө байланыштуу долбоор түзүп жатканы былтыр март айында кабарланган. (MrA)
