Украинанын борбору Киевде коронавируска байланыштуу чектөөлөр 30-апрелге чейин узартылды. Шаардын мэри Виталий Кличко 14-апрелде калаада коронавирус жуктургандар жана андан каза болгондор көбөйүп жатканын билдирди.
“Башка аргабыз жок. Андай болбосо бейтаптардын саны мындан ары да көбөйсө, саламаттык сактоо система көтөрө албайт»,-деди Кличко.
Киевде карантиндик чаралар өткөн айда киргизилген. Ага ылайык, мектептер, бала бакчалар, театрлар жана соода борборлору жабылган. Ал эми коомдук транспорт да чектелүү санда иштеп жатат.
Виталий Кличко мекеме-уюмдарды жумушчуларын аралыктан иштөөгө же эмгек өргүүсүнө чыгуу үчүн шарттарды түзүүгө чакырды.
13-апрелде Киевде 1457 адамдан вирус аныкталып, 47 адам каза болду. Пандемия башталгандан бери Украинада 1,9 миллион адам вирус жуктурса, 38 миңден ашыгы көз жумду.
