Кыргызстандын саламаттык сактоо жана социалдык өнүгүү министри Алымкадыр Бейшеналиев жакынкы убакта коронавируска каршы "AstraZeneca" вакцинасынын 405 миң дозасы келерин билдирди. Ага ылайык, бул препарат Дүйнөлүк саламаттык сактоо уюму (ДССУ) аркылуу алынганы жатат.
"Вакцинадан тышкары бардык керектүү каражат-жабдыктарды, шприцтерди да алып жатабыз. Вакцинаны сактай турган кампабыз бар", деди министр.
Бейшеналиев аталган вакцинанын тегерегинде Европадагы маалыматтар кабатыр кылып жатканын белгиледи. Бирок Кыргызстанга жөнөтүлгөнчө ДССУ анын себептерин аныктайт деген үмүт бардыгын кошумчалады.
Өткөн айда Кыргызстан COVAX эл аралык программасынын алкагында "AstraZeneca" вакцинасынан 2,6 миллион дозасын алуудан баш тарткан. Анда Бейшеналиев бул препараттын кемчиликтери аныкталмайынча аны алуу токтотулганын билдирген.
Европанын Дания, Венгрия өңдүү өлкөлөрүндө "AstraZeneca" менен эмделген адамдардын абалы начарлап, көз жумган учурлары катталган.
Кыргызстан жакынкы күндөрү коронавируска каршы "Спутник V" вакцинасын алганы жатат. Расмий маалыматка ылайык, алгач 30 миң доза келет. Бишкек Москвадан бир миллион доза "Спутник V" вакцинасын сураган.
Өлкөдө коронавируска каршы эмдөө 29-мартта Кытайдын "SinoPharm" вакцинасы менен башталган. Эмдөө ыктыярдуу негизде, атайын ачылган пункттарда жүргүзүлүүдө. Бээжин Бишкекке 75 миң адамга эсептелген 150 миң доза вакцина жөнөткөн.
Кыргызстанда коронавирус 90 миңден ашык адамга жукту, бул илдеттен 1,5 миңден көп бейтаптын өмүрү кыйылды. (ZKo)
