Ош шаардык мэриясынын басма сөз катчысы Азамат Абсаттаров мэрияга караштуу атайын комиссия мектептерди убактылуу жабуу тууралуу чечим кабыл алганын "Азаттыкка" билдирди:
"Ал комиссия бүгүн, 14-апрелде жыйынга чогулуп, "Олимп" жана "Жетиген" мектептерин 14 күнгө жабуу чечими кабыл алынды. Бул убакыт аралыгында калган окуучулардан вирус аныкталбаса кайра ачылат”.
13-апрелде шаардагы "Жетиген" жана "Олимп" мектептеринин ар биринде бирден окуучудан коронавирус чыккан. Эки мектепте тең 900дөн көп окуучу билим алат.
14-апрелге карата Ош шаарында COVID-19 вирусун жуктуруп алгандар катталган жок.
Кыргызстанда коронавирусту 91 миңге чукул адам жуктуруп алды жана анын 86 миңден көбү айыкты. Бул илдет 1534 бейтаптын өмүрүн кыйды. (MrA)
