11-апрелде өтө турган жергиликтүү кеңештерге шайлоого жана Баш мыйзамдын жаңы долбоору боюнча референдумга үгүт иштери аяктады.
Мыйзамга ылайык, бүгүн – добуш берүүгө бир күн калганда үгүт иштерин жүргүзүүгө тыюу салынат.
Кыргызстанда 11-апрелде 448 кеңештин, анын ичинде 28 шаардык жана 420 айылдык кеңештин депутаттары шайланат.
Ушул эле күнү президенттик башкарууга ыктаган Конституциянын жаңы долбоору референдумга коюлат.
Борбордук шайлоо комиссиясынын маалыматы боюнча 11-апрелдеги референдумга 3 606 201 адам катыша алат.
Эгер референдумга жалпы шайлоочулардын катышуусу 30 пайызга жетпесе, өткөн жок деп эсептелет.
Референдумду өткөрүү үчүн 2483 шайлоо тилкеси ачылды. Анын 48и чет мамлекеттерде.
