Быйыл январь жана февраль айларында Кыргызстан 5 млрд. 457,8 млн. сом мамлекеттик (ички жана тышкы карыз) карызын төлөдү.
Анын ичинен 3 млрд. 49,4 млн. сом тышкы карызды, 2 млрд. 408,4 млн. сом ички карызды жабууга жумшалды.
Экономика жана финансы министрлигинин маалыматына ылайык, өлкөнүн жалпы карызы (ички жана тышкы карыз) 31-январга карата 4 млрд. 954,11 млн. долларга жетти. Кыргыз сому менен эсептегенде 420 млрд. 108,67 млн сом.
Мунун 85,2% же 4 млрд. 221,61 млн. доллары (357 млрд. 992,44 млн. сом) тышкы, 14,8 % же 732,50 млн. доллары (62 млрд. 116,23 млн. сом) ички карыз.
Экономика жана финансы министрлиги тышкы карыздын негизги суммасын төлөө 2023-2028-жылдарга туура келе турганын билдирди. Бул убакыт аралыгында Кыргызстан жыл сайын тышкы карыз үчүн 350 млн. доллардан 400 млн. долларга чейин бөлүүгө туура келет.
Тышкы карыздын көбүн Кытайдын Экспорттук-Импорттук банкынан (Эксимбанк) алынган насыя түзөт. Президент Садыр Жапаров 15-мартта «Азаттыкка» курган маегинде карыз келишимде каралгандай өз убагында төлөнбөсө, айрым объекттер Кытайдын башкаруусуна өтөрүн билдирген.
Өлкө башчынын сөзүнө караганда, алар Бишкек жылуулук электр борбору (ЖЭБ), «Түштүк-Түндүк» альтернативдүү жолу жана «Датка-Кемин» электр чубалгысы. Кыргызстан Кытайдан насыялардын көбүн ушул долбоорлорду ишке ашыруу үчүн алган.
Садыр Жапаров Кыргызстандын тышкы карыздан өз мөөнөтүндө кутулуу үчүн ишенимдүү каржы булактары бар экенин айтты. (BTo)
