Бүгүн 28-февралда Киев шаарында жыйынтыкталып жаткан күрөш боюнча эл аралык турнирде Айсулуу Тыныбекова 62 кг салмакта мелдешти жеңди. Ал финалда украиналык балбан Илона Прокопевнюкту 9:7 эсебинде утуп, алтын медаль тагынды.
27-февралда Мээрим Жуманазарова менен Үзүр Жусупбеков алтын байгени алышты. Айпери Медет кызы күмүш, Бекболот Мырзаназар уулу коло байгеге арзыган. Жуманазарова 27-февралда кыз-келиндер күрөшүнөн 68 кг чейинки салмакта килемге чыгып, финалда канадалык Оливия Ди Баккону жеңди (1:1).
Грек-рим күрөшүнөн 97 кг чейинки салмакта килемге чыккан Үзүр Жусупбеков финалда күрөшпөй жеңишке жетти. Грузиялык балбан Гиорги Мелия килемге чыкканы менен травма алгандыктан күрөшүүдөн баш тартып, кыргыз балбаны жеңүүчү деп жарыяланды.
Айсулуу Тыныбекова азыркы тапта Дүйнө чемпиону. Ал бул наамга 2 жыл мурда Нур-Султан шаарында өткөн чемпионатта жеткен. (ZKo)
