Түркмөнстанда Алабай тукумундагы итке байланыштуу майрам негизделди. Бул майрам мындан ары жыл сайын апрелдин соңку жекшембисинде - Ахал-теке жылкысынын (Ahal-teke aty - түркмөнчө - ред.) күнү менен чогуу белгиленет.
Тийиштүү жарлыкка президент Гурбангулы Бердымухамедов кол койгонун жергиликтүү басылмалар 25-февралда кабарлашты.
2020-жылдын ноябрында Бердымухамедов Ашхабадда алабайдын алтын жалатылган эстелигин салтанаттуу түрдө ачып берген. Эстеликтин астына Led-монитор орнотулуп, алабай породасындагы иттер катышкан видеороликтер көрсөтүлгөн.
Эстелик ачылардан 2 ай мурун Бердымухамедов түркмөн алабайы жөнүндө китеп жазган. Мамлекет башчынын алабайды мактаган ырларына Түркмөнстанда обон чыгарылып, ырчылар аны аткарып жүрүшөт.
