Johnson & Johnson компаниясынын вакцинасы COVID-19 илдетинен натыйжалуу коргой алары маалым болду.
Бул тууралуу АКШнын Тамак-аштын жана дары-дармектин сапатына көз салган башкармалыгы 24-февралда билдирди.
Мекеме ошондой эле аталган вакцина коопсуз экенин, илдеттин оор түрлөрүнө каршы 85%, ал эми жеңил формаларына каршы 66% туруштук бере аларын кабарлады. Эми иликтөөнүн жыйынтыгын көз карандысыз адистер талкуулап чыгышкан соң, АКШда бул вакцина менен эмдөөгө уруксат берилери күтүлүп жатат.
Буга чейин Кошмо Штаттарда «Модерна» жана Pfizer-BioNTech компанияларынын вакциналарын саюуга уруксат берилген.
Johnson & Johnson компаниясынын вакцинасы башкалардан айырмаланып, бир эле доза сайылат жана кадимки муздаткычта сакталат. Британияда жүргүзүлгөн соңку иликтөөлөр Pfizer-BioNTech вакцинасынын эки дозасы да организмде коронавируска каршы күчтүү иммунитет жаратарын көрсөттү. Мындай жыйынтык эмделген жарым миллион адамга жүргүзүлгөн байкоолордон кийин чыгарылды.
Ошондой эле Pfizer-BioNTech вакцинасынын биринчи дозасы да илдеттин оор формасына туруштук бере алары белгилүү болду.
