Эмгек жана социалдык өнүктүрүү министрлиги 117 маалымат сурап билүү линиясын ишке киргизерин кабарлады.
117 байланыш телефону оор кырдаалга кабылган адамдарга, анын ичинде гендердик, үй-бүлөлүк зомбулукка кабылгандарга кеңеш берүү максатында түзүлүп жатат. 117 номуруна чалуу акысыз. Зомбулукка кабылгандарга алгачкы укуктук жана психологиялык жардам берилет.
Эмгек жана социалдык өнүгүү министрлигинин маалыматына ылайык, Кыргызстанда 2019-жылга салыштырмалуу 2020-жылы үй-бүлөлүк зомбулук 12% көбөйдү. 2020-жылы коронавирус пандемиясына байланыштуу киргизилген карантин учурунда зомбулук 65% көбөйгөн.
Үй-бүлөдө аялдарга каршы жасалган зомбулук - Кыргызстанда кеңири талкууга түшкөн социалдык маселелердин бири. 2021-жылдын январь айында эле Ысык-Көл облусунун Каракол шаарында эки жаш келин өз жанын кыйып, өмүр менен кош айтышты. Экөөнүн артында жети бала калды. Түп районунда төрт баланын энеси күйөөсүнүн зомбулугунун курмандыгы болду. (TSh)
