Бишкектеги Алыкул Осмонов атындагы Улуттук китепканада бүгүн, 15-январда «Адамдын эмгектен улуу тиреги жок» аттуу китеп-сүрөт көргөзмө жана чыгармачылык кече өткөнү жатат.
Саат 14.00гө белгиленген иш-чара филология илимдеринин доктору, академик Абдылдажан Акматалиевдин 65 жылдык мааракесине арналган.
Бул тууралуу Улуттук китепкананын басма сөз кызматы билдирди.
Маалыматка караганда, китеп-сүрөт көргөзмөдө Акматалиевдин китептери, эмгектери, ал жөнүндө жазылган макалалар, гезит-журналга чыккан материалдар жана сүрөттөр коюлат.
Абдылдажан Акматалиев адабият тармагында ондогон илимий эмгектерди жараткан.
2000-2004-жылдары эки жолу илим жана техника боюнча мамлекеттик сыйлыкка татыктуу болгон. Кыргыз улуттук илимдер академиясынын корреспондент-мүчөлүгүнө шайланган. Акматалиевдин эмгектеринин басымдуу бөлүгүн Чыңгыз Айтматов жана «Манас» эпосу тууралуу изилдөөлөр түзөт.
Ал 1956-жылдын 15-январында Нарын шаарында туулган. (NT)
