Борбордук шайлоо комиссиясы 10-январдагы добуш берүүгө 3 564 бюллетень кошумча чыгарылганын билдирди.
Мыйзамга ылайык, бюллетендер добуш берүүчүлөрдүн санынан 0,1% көбүрөөк басылышы керек. Бул тиешелүү кагаз керектен чыгып калган же бузулуп калган учурлар үчүн эске алынган.
БШКнын төрайымы Нуржан Шайлдабекованын маалыматына караганда, 10-январда боло турган президенттик шайлоого жана мамлекеттик башкаруу формасын тандоочу референдумга 3 567 138 бюллетень даярдалды.
«Бюллетендердин саны так ушул соңку тизмеге ылайык чыгарылды, - деди ал. - Президентти шайлоо үчүн өзүнчө ак түстө, референдум үчүн өзүнчө көгүш түстө чыгарылды. Ошондо ар бир добуш бериш үчүн өз-өзүнчө 3 567 138ден бюллетень басылды».
Алдыдагы президенттик шайлоого жана башкаруу формасын аныктоо боюнча референдумга карата бюллетендер аймактарга жана чет жактагы добушканаларга 2-январда жиберилген.
Президенттик кезексиз шайлоо менен кошо башкаруу формасын аныктоочу референдум 10-январда өтөт. Президенттик шайлоого 17 талапкер ат салышууда. (ZKo)
