Ош облусундагы Ноокат районунун Он Эки-Бел айыл өкмөтүнүн тургуну Мамат Мураталиевдин үй-бүлөсү айылдагы ооруканага «Тез жардам» автоунаасын алып берди. Мураталиевдин айтымында Он Эки-Бел жана Төөлөс айыл өкмөттөрүн жалгыз автоунаа тейлеп жаткан.
Мураталиевдер унааны чет өлкөдөн 13 миң АКШ долларына алып келишкен.
«Бала-чакам иштеп жатат, мен иштеп жатам элге жардам кылалы дедик. Ооруканада эски «Тез жардам» машинесинен бирөө эле иштеп жаткан экен», - деди ал.
Коронавирус Ош облусу боюнча алгач ирет Ноокат районунан 20-мартта аныкталган.
Коронавируска каршы күрөш боюнча республикалык штабдын 22-декабрдагы маалыматына караганда, акыркы бир сутка ичинде COVID-19 жана пневмониядан төрт киши каза болду. 175 кишиге вирус жукканы маалым болду.
Саламаттык сактоо министрлигинин жаңы эсеби боюнча коронавирус пандемиясы башталган март айынан бери илдеттин курмандыктары 1335 кишиге жетти. Ал эми инфекцияны жугузуп алгандардын жалпы саны 79429 адамга жетти. (DU)
