АКШнын кызматтык мөөнөтү аяктап жаткан президенти Дональд Трамптын администрациясы ондогон кытайлык компанияны "кара тизмеге" киргизүүнү көздөп жатат.
"Рейтер" агенттигинин маалыматына караганда, администрациянын бутасына бул ирет Кытайдын 60 фирмасы менен алардын филиалдары илингени турат. Эгер "кара тизмеге" киргизилсе, алар Американын жогорку технологиялар базарына чыга алышпайт.
Вашингтон санкцияга илине турган компаниялар Кытайдын куралдуу күчтөрүнө, Түштүк-Кытай деңизиндеги аралдарды милитаризациялоого жана адам укуктарынын бузулушуна катышы бар деп эсептейт.
Мындай компаниялардын арасында микросхемаларды чыгаруучу SMIC (Semiconductor Manufacturing International) компаниясы бар.
Кытайлык жүздөгөн компанияларга, анын ичинде Huawei, ZTE, Hikvision ишканаларына буга чейин "Шинжаңдагы улуттук азчылыктарды дискриминациялоого тиешеси бар" деген негизде санкция салынган.
Кытайдын Тышкы иштер министрлиги АКШнын соңку аракеттерин «чет элдик компанияларды негизсиз сүрүп чыгаруу» деп атап, өз укуктарын коргоо үчүн тиешелүү чараларды көрө турганын билдирди.
