«Араб жазы» деп аталган мусулман мамлекеттериндеги элдик толкундоолорго түрткү берген Тунистеги окуяга 10 жыл болду.
Өлкөдөгү жакырчылык жана өкмөттүн өкүмзардыгы жанына баткан Мохамед Буазизи деген жигит Сиди-Бузиди шаарчасында өзүн-өзү өрттөп салгандан кийин ыңкылап башталган. Анын күчү менен бийликтен кулатылган президент Бен Али Сауд Арабиясына кире качып, кийин сыртынан түрмөгө кесилген.
«Араб жазы» улам коңшу мамлекеттерге да жайылып, Египетте, Ливияда диктаторлордун бийлиги кулаган. Сирияда жарандык согуш башталган. Бул өлкөлөрдүн айрымдарында ушул күнгө чейин тынчтык орной элек.
