Президенттикке талапкер, ички иштер министринин мурдагы орун басары Курсан Асановдун бөгөт чарасы өзгөртүлдү. Эми ал бүт өлкө боюнча эркин жүрө алат, бирок чет элге чыга албайт. Бишкек шаардык соту 16-декабрда ушундай чечим чыгарганын адвокаты Чынара Жакупбаева «Азаттыкка» билдирди.
Курсан Асанов 2019-жылы Чүйдүн Кой-Таш айылында мурдагы президент Алмазбек Атамбаевди кармоо операциясында кызмат абалынан кыянат пайдаланган деп айыпталууда. Андан тышкары, 2020-жылдын октябрындагы парламенттик шайлоодон кийинки башаламандыкка байланыштуу козголгон кылмыш ишинин алкагында да күнөөлөнүүдө. Буга байланыштуу Курсан Асанов үй камагында болчу.
Ал 2021-жылдын 10-январында өтө турган президенттик шайлоого талапкер катары катышып жатат. Үгүт иштери 15-декабрда башталган. Президенттик кызмат үчүн 18 талапкер ат салышууда. (SE)
