11-12-декабрь күндөрү коронавирустун белгилери менен Түркмөнабад шаарындагы ооруканаларда жаткан 15 бейтап каза болду. Бул тууралуу «Азаттыктын» түркмөн кызматы билдирди.
«Түркмөнабаддагы шаардык инфекциялык оорукада күн өткөн сайын COVID-19дун белгилери менен жаткырылгандар жана каза болгондор көбөйүүдө. 12-декабрда бул медициналык жайда сегиз киши көз жумду», — деди шаардагы тез жардам кызматынын дарыгери. Анын айтымында, 11-декабрда да шаардагы ооруканаларда дарыланып жаткан жети киши каза болгон.
«Мындан тышкары коронавирустун белгилери бар 10 киши оор абалда ооруканага жеткирилди. Аларга да пневмония диагнозу коюлду», - деди дарыгер.
Түркмөнстандын бийлиги өлкөдө бүгүнкү күнгө чейин коронавирус жуккан бир да учур катталбаганын билдирип келет.
Дүйнөлүк саламаттык сактоо уюмунун 15-декабрга карата берген маалыматына ылайык, дүйнө жүзүндө 73 803 320 киши коронавирус илдети менен ооруду. Анын ичинен 1 641 440 киши оорудан көз жумду. 51 813 957 адам сакайып чыкты.
Коронавирус 2019-жылы декабрда Кытайдын Ухань шаарында алгачкы жолу катталган. Бул аралыкта илдет дүйнөдөгү 220 өлкөнү каптады.