Экономикалык кылмыштарга каршы күрөш боюнча мамлекеттик кызмат (Финансы полициясы) Саламаттык сактоо министрлигинин жетекчилигине жана башка тиешелүү органдардын башчыларына кызмат абалынан пайдалануу фактысы боюнча кылмыш ишин козгоду. Бул тууралуу Финполиция 19-октябрда маалымдады.
Финполдун маалыматында: «Тергөө-иликтөө иштерини натыйжасында Саламаттык сактоо министрлиги тарабынан «Газел Соболь» үлгүсүндөгү 10, үч «Форд Транзит» үлгүсүндөгү «Тез жардам» автоунаасын жалпы бир млн. долларга кымбат баада сатып алганы, натыйжада андан мамлекет ири өлчөмдө зыян тартканы аныкталды», деп жазылган.
Мындан тышкары бул фактыга тиешеси бар башка жогорку кызматтагы аткаминерлерди аныктоо иштери жүрүп жатат.
Быйыл 15-июлда Саламаттык сактоо министрлиги 13 «Тез жардам» автоунаасын жалпысынан 764,9 миң долларга сатып алганы кабарланган. Машинелер Дүйнөлүк банктын «Кыргызстанда түрдүү кырсыктарга туруштукту күчөтүү» долбоорунун алкагында алынган.
«Тез жардам» автоунаалары кымбат сатылып алынганы тууралу сын-пикирлер дароо эле соцтармактарга чыккан. Саламаттык сактоо министрлиги ага жооп кылып, 13 машиненин үчөө экинчи класстагы реанимобил экенин, анда кубаттоочу шаймандар менен жасалма дем алдыруучу аппараттар орнотулганын, бул «Форд Транзит» үлгүсүндөгү ар бир машине 90 миң доллардан алынганын кабарлаган. Калганы дизел менен жүрүүчү 4WD «Соболь» (Газел) үлгүсүндөгү машинелер. Алардын ичине адамды дем алдыруучу системалар, кычкылтек баллондору, чоңдорго, балдарга ыкчам медициналык жардам көрсөтүш үчүн бардык жабдуулар орнотулган. Баасы болжол менен 49 миң доллардан айланган. (ZKo)
