АКШнын президенттигине талапкер Жо Байден Орусияны келерки президенттик шайлоого да кийлигишүүгө аракеттенип жатат деп айыптады. Ал мындай маалыматты чалгын кызматынан алганын билдирди.
Батыштагы маалымат каражаттары Байдендин "Биз алардын планы тууралуу мурда деле билгенбиз. Орусия мурдагыдай эле биздин шайлоонун легитимдүүлүгүн бузууга аракет кылып жатат. Бул факт”, -деген сөзүн жазып чыгышты.
Мурдагы вице-президент, демократтардын президенттикке талапкери Жо Байден 17-июлда шайлоого карата каражат топтоо боюнча онлайн жыйында эгер ал президент болуп шайланса, Орусия бул кылыгы үчүн жооп бере турганын эскертти. Ал ошондой эле Кытайды 2020-жылдагы шайлоонун акыйкаттыгына америкалыктар ишенбөөсүнө аракеттенип жатат деп айыптады.
Жо Байдендин бул билдирүүсүнө Ак үй жооп бере элек.
Жо Байден быйыл 3-ноябрда азыркы президент Дональд Трамп менен атаандаштык болуп президенттик шайлоого катышат. Эгер утуп чыкса, Байден мамлекет башчылык кызматына 2021-жылдын 20-январынан тарта киришет.
АКШнын атайын кызматтары 2016-жылкы президенттик шайлоого Орусия кийлигишкени тууралуу маалымдашкан. Алар Москва талапкер Трамптын утуп чыгышына кызыкдар болгонун белгилешкен. Дональд Трамп муну четке каккан.
