Бишкектин Биринчи май райондук сотунда 22-июнда уланган Кой-Таш окуясы боюнча соттук териштирүүдө мурдагы президент Алмазбек Атамбаевдин кеңешчиси Кундуз Жолдубаевага прокурорлор жети берене менен айып тагышты. Бул тууралуу Жолдубаева өзү билдирип, аны абсурд деп атады.
Жолдубаева бийликти күч менен басып алууга, барымтага алууну, массалык башаламандыктарды уюштурууга жана башка кылмыштык аракеттерге айыпталууда.
«Прокурорлордун ушундай абсурд айыптоосу – өлкөнү башкарып жаткан үй-бүлөлүк-кландык режим бийлигин жоготуп алуудан коркуп жатканын далилдейт. Кой-Таш окуясы бийликти сындаган кишилерди башкаларга көрсөтүү менен камчылап коюу болуп калды. Бүгүн соттук отурумда мага коюлган бардык айыптар - абсурд»,- деп айтылат Кундуз Жолдубаеванын кайрылуусунда.
Биринчи май райондук сотунун 22-июндагы отурумунда соттолуучуларга айыптарын угузуу уланды. Мамлекеттик айыптоочу айыптоо актысы менен тааныштырууну 15-июндагы сот отурумунда баштаган.
Кой-Таш окуясы боюнча мурдагы президент Алмазбек Атамбаев, азыркы жана мурдагы депутаттар Ирина Карамушкина, Асел Кодуранова, Равшан Жээнбеков баштаган 14 кишинин тергөө иши февралда сотко өтүп, ишти Биринчи май райондук соту 3-марттан бери карап жатат.
Тергөөнүн жыйынтыгы боюнча Атамбаев баштаган 19 кишиге айып тагылган. Тергөө менен кызматташкан бешөөнүн иши өзүнчө тергелүүдө.
Мурдагы президент Алмазбек Атамбаев былтыр Кой-Таштагы операцияда кармалып, УКМКнын тергөө абагына киргизилген. Атайын операцияда бир офицер курман болуп, 200дөй киши жабыркаган. Кой-Таш окуясы боюнча Жазык кодексинин «Киши өлтүрүү», «Адамдын өмүрүнө кол салуу», «Барымтага алуу», «Массалык баш аламандык», «Бейбаштык», «Бийлик өкүлдөрүнө коркунуч келтирүү жана зомбулук» өңдүү беренелеринин негизинде кылмыш иши козголгон.
Мындан тышкары Алмазбек Атамбаев Батукаевдин ишинде коррупцияга айыпталууда. Атамбаевдин тарапташтары мындай дооматтарды бийликтин куугунтугу катары баалап келатышат. (ErN)
