Казакстанда коронавирус соңку бир суткада 97 кишинин өмүрүн алды. 7500дей кишиден вирус аныкталды. Жогорку көрсөткүчтөр коронавирустун "дельта" штаммына байланыштуу экенин саламаттык сактоо министри Алексей Цой 29-июлда билдирди.
Ал ошондой эле, оор абалдагылардын көбүнүн өнөкөт оорулары болгонун жана вакцина албагандар экенин кошумчалады.
"Тилекке каршы, ооругандардын 99% эмделбегендер. Муну токтотуу үчүн бардык чараларды көрүп, вакцинация кампаниясын күчөтүүдөбүз", - деди Цой.
Министрдин айтымында, учурда инфекциялык ооруканалардын жарымынан көбү толгон. Цой айрым аймактарда ооруканаларда орун калбай калуусу мүмкүн экенин эскертти.
Казакстанда элди Карагандада чыгарылган Орусиянын «Спутник V», жергиликтүү QazVac жана Кытайдын CoronaVac вакциналары менен эмдеп жатышат.
29-июлдагы маалыматына караганда, бир суткада Кыргызстанда инфекциядан 13 адам каза болду.
Жалпысынан өлкөдө коронавирустан көз жумгандардын расмий саны 2306 адамга жетти.
Соңку бир күн ичинде вирус дагы 930 адамдан табылды. Алардын эң көбү Бишкек шаарында (528) жана Чүй облусунда (142).
Өлкөдө бул оору жуккандардын расмий катталган саны 161 015ке жетти.
Бир күндө 1450 адам айыгып чыкты. Азыр ооруканада 3746 адам жатат, дагы 12 164 бейтап үйдөн дарыланууда.
Кыргызстанда 2020-жылдын март айында башталган коронавирус эпидемиясы июль айында курчуп, көп киши каза болгон. Сентябрдын башында каза болгондор катталбай калган. Оорунун экинчи толкуну октябрда башталып, быйыл жазында вирусту жугузуп алгандардын саны кыйла азайган жана күнүнө 30га жетпеген бейтап катталып жаткан.
Адистер расмий статистика чыныгы абалды чагылдырбай жатканын, ооругандар да, каза болгондор да андан көбүрөөк экенин айтып келишет.
15-июнда Саламаттык сактоо жана социалдык өнүктүрүү министрлиги өлкөдө коронавирус эпидемясынын үчүнчү толкуну жүрүп жатканын расмий билдирген. Июндун башында бир күндө коронавирус менен 2 миңге чукул бейтап катталып жаткан.
Кыргызстанда 460 миңден ашуун жаран коронавируска каршы вакцина алды. Алардын 107 миңден көбү эки дозаны тең сайдырышты. Учурда өлкөдө вакциналардын 1 миллион 100 миң чамалуу запасы бар. Бул 26-июль, таңкы саат 7ге карата маалымат.
Эмделгендердин эсеби Саламаттык сактоо жана социалдык өнүктүрүү министрлигинин Электрондук саламаттык борборунун маалымат базасында күнү-түнү жаңыртылууда.
Кыргызстандыктарды эмдөөгө негизинен Кытайдын Sinopharm компаниясынын вакцинасы, андан тышкары Европа өндүрүшүндөгү AstraZeneca жана Орусиянын Sputnik-V препараттары колдонулууда.
Вакцина 18 жаштан өткөн жарандарга эки дозада акысыз сайылат. Аралыгы 21 күн болууга тийиш.
Коронавируска каршы республикалык ыкчам штабдын 26-июлдагы маалыматына караганда, кечээтен бери Кыргызстанда бул инфекциядан 12 адам каза болду.
Жалпысынан өлкөдө коронавирустан каза болгондордун расмий саны 2261 адамга жетти.
Соңку бир күн ичинде вирус дагы 973 адамдан табылды. Алардын эң көбү Бишкек шаарында (637) жана Жалал-Абад облусунда (92).
Өлкөдө бул оору жуккандардын расмий катталган саны 158 120 адамга жетти.
Бир күндө 1568 адам айыгып чыкты. Азыр ооруканада 4187 адам жатат, дагы 13 691 бейтап үйдөн дарыланууда.
