Кыргызстанда коронавирус жуккан медицина кызматкерлерине мамлекеттен компенсация төлөө маселеси чечилди. Бул тууралуу 5-майда “Азаттык” радиосуна Саламаттык сактоо министрлигинин юридика бөлүмүнүн башчысы Азамат Жумакеев билдирди.
Анын айтымында, тиешелүү буйрук бүгүн чыкты:
"Бүгүн өкмөттүн буйругу чыкты. Ал жерде оору жуккан медицина кызматкерлерине 200 миң сом, ал эми каза болгондорго 1 миллион сом деп так көрсөтүлдү. Эртеңден тартып төлөнө баштайт".
Жалпысынан 5-майга карата Кыргызстанда коронавирус 843 адамдан табылды, алардын 217си медицина кызматкери. 11 бейтап кайтыш болду, алардын бири Бишкектеги №3 бейтапкананын дарыгери болчу. 600 адам айыгып чыкты, алардын 150сү медицина кызматкери.
Коронавирус жуккан дарыгерлерге компенсация тууралуу буйрук азырынча расмий жарыялана элек. Өкмөттүн бул боюнча планы тууралуу 10-апрелде айтылган. (RK)
