Кыргызстанда өзгөчө абал жарыяланган аймактарга анын шарттарын аткаруу жана адамдардын коопсуздугун камсыз кылуу үчүн Куралдуу күчтөрдүн аскер кызматкерлери киргизилет. Бул тууралуу Куралдуу күчтөрдүн Башкы штабынын башчысы Райымберди Дүйшембиев 24-мартта билдирди. Анын айтымында, аскер кызматкерлеринин саны жана тийиштүү каражаттары жетиштүү.
«Өзгөчө абалда сөзсүз тиешелүү чечимдердин негизинде Куралдуу күчтөрдүн бөлүкчөлөрү киргизилет. Саны боюнча ошол жердеги коюлган тапшырманы, режимди сактоого жетиштүү», - деди ал.
24-мартта президент Сооронбай Жээнбеков Бишкек, Ош жана Жалал-Абад шаарларынын, Ош облусунун Ноокат, Кара-Суу райондорунун, ошондой эле Жалал-Абад облусунун Сузак районунун аймактарына өзгөчө абал киргизүү жөнүндө жарлыктарга кол койду.
Кыргызстанда коронавирус жуккан дагы 26 адам катталды, ошону менен жалпысынан 24-мартка карата бул илдетке чалдыккандардын саны өлкөдө 42 кишиге жетти. (BTo)
