АКШнын Ооганстан боюнча атайын чабарманы Залмай Халилзад бул кызматка дайындалгандан бери Кабулга эң жемиштүү сапар жасаганын билдирди.
68 жаштагы дипломат кошуна Пакистанга, андан ары Катарга жөнөп жатканын 31-июлда айтты. Катардын борбору Доха шаарында Ооганстанда 18 жылдан бери токтобой келаткан согушка чекит коюу максатында «Талибан» кыймылы менен сүйлөшүүлөрдүн 9-айлампасы өтмөкчү. Дохада "Талибандын" саясий кеңсеси жайгашкан.
"Вашингтон менен Кабул жаңы кадамдарды макулдашты. Сүйлөшүүгө катышуучу жана техникалык көмөк көрсөтүүчү топтор аныкталды", - деп жазды "Твиттерге" Халилзад.
Кыймылдын маалымат катчысы Забихулла Мужахиддин айтымында, «Талибандын» сүйлөшүүлөргө катышкан жогорку өкүлдөрүнөн турган топ Жакарта шаарына бет алды.
"АКШнын чабарманы менен сүйлөшүүлөр алар кайтып келгенден кийин уланат", - деп кошумчалады Мужахид.
"Талибан" Кабул өкмөтүн "Батыштын кол баласы" деп атап, алар менен тикелей жолугушуудан баш тартып келет.
