Кыргызстанда кулчулук курмандыктары баш калкалай турган жай курулат. Өкмөттүн токтому менен бекитилген планды уюштуруу иши башталды. Бул тууралуу «Азаттыкка» Мамлекеттик миграция кызматынын жетекчисинин орун басары Самат Токтоболотов билдирди:
- Ал кимдин базасында болот, ИИМдинби же биздинби, балким жаңы түзүлөбү - ошол маселелерди карап жатабыз.
Маалыматка караганда, мындай жай өлкөнүн түштүгүндө жана түндүгүндө курулушу мүмкүн. Учурда аны каржылоо, донор уюмдарды катыштыруу мүмкүнчүлүгү талкууланып жатат. Кыргызстанда 2018-жылы «Киши сатуу» беренеси боюнча сегиз кылмыш иши козголсо, быйыл жыл башынан бери төрт иш козголгон. (КЕ)
