Баткен облустук прокурорунун өлүмү үчүн шек саналып камакка алынган Мелис Калыковдун арызын териштирүү Кара-Суу шаардык сотунда каралат. Алгач 15-майга белгиленген отурум даттануучунун сотко жеткирилбегенине байланыштуу 16-майга жылдырылган.
Адвокаты Асылбек Кунгуров «Азаттыкка» билдиргендей, Мелис Калыков тергөө ишине канааттанбай, тергөөчүлөрдү сотко берген. Ош шаардык сотунда судьялар жетишсиз болгондуктан, иш Кара-Суу шаардык сотунда каралууда.
Баткен облусунун прокурору, 43 жаштагы Анарбай Мамажакыповдун киши колдуу болгон сөөгү 18-ноябрда Баткендеги тоо арасынан табылган. Кылмышка шектүү катары Баткен облустук капиталдык курулуш башкармалыгынын башчысы Мелис Калыков кармалган. Учурда ал Ош шаарындагы тергөө абагында.
