Кыргызстандын Өнөр жай, энергетика жана жер казынасын пайдалануу боюнча мамлекеттик комитети Кызыл-Омпол кенине байланыштуу инвестор компанияны колдойт. Бул тууралуу бүгүн Жогорку Кеңеште маалымат берип жатып комитеттин жетекчиси Эмил Осмонбетов билдирди.
- Кызыл-Омпол боюнча биздин позиция - негизи инвесторду колдошубуз керек. Бирок эгер мыйзамсыз иш болсо, анда токтотобуз. Кызыл-Омполдогу уранды алып чыгып кетиш керек, - деди Осмонбетов.
Ысык-Көлдүн Тоң районундагы Кызыл-Омпол кенинде уран чалгындоого каршы нааразылык акциялары уланып жатат. Бишкекте, Балыкчыда катар-катар митингдер өттү.
Биринчи вице-премьер-министр Кубатбек Боронов 25-апрелде Тоң районунун тургундары менен жолугушкан учурда Кызыл-Омпол кени боюнча «Кыргызстандагы ЮрАзия» компаниясына берилген лицензия кайтарып алынып, кенди иштетүүгө толук тыюу салынганын айткан.
22-апрелде Кызыл-Омпол уран кенинин иши убактылуу токтотулган. (BTo)
