Жогорку соттун төрайымы Гүлбара Калиева жалпыга маалымдоо каражаттарынын жетекчилери менен жолугушуп жатып, сот корпусу 70 пайызга жаңырганын жана реформа жүрүп жатканын айтты.
- «Реформа жүрбөй жатат» деген туура эмес. Жаңы имараттар салынып, эскилер ремонттолуп жатат. Аудио жана видео фиксация киргизилип жатат, - деди Гүлбара Калиева.
Ал журналисттердин: «Сиздер өйдө жакты карап иш кыласыңарбы?» - деген суроосуна: «Ооба, өйдө жакты, Кудайды карайбыз», - деп жооп берди.
Акыркы учурда сот тармагы өлкө жетекчилиги тарабынан катуу сынга алынып келген. 2019-жылдын 11-мартында Бишкекте өткөн соттордун XI курултайында президент Сооронбай Жээнбеков сот тармагына бөлүнгөн каражаттарды көбөйтүү өзүн актабай жатканын айткан.
Расмий маалыматка караганда, сот системасына 2016-жылы 1 миллиард 213 миллион сом, 2017-жылы 1 миллиард 260 миллион сом, 2018-жылы 1 миллиард 555 миллион сом жана 2019-жылы 2 миллиард 154 миллион сом бөлүнгөн. Буга сот тармагына чет жактан келген гранттар менен ар кандай долбоорлордун акчасы кошулган жок. (AzK/KR)
