Жаңы жарыяланган маалыматка караганда, Түндүк Корея курал сынап, ракета учурган жайын жарым-жартылай калыбына келтире баштады. Былтыр АКШ президенти Дональд Трамп менен Түндүк Кореянын лидери Ким Чен Ындын биринчи жолугушуусунан кийин бул жай бузула баштаган.
5-мартта Сеулдун «Yonhap» кабарлар агенттиги Түштүк Кореянын Улуттук чалгын кызматынын маалыматына таянып, «Tongchang-ri» полигонунда иш жүрө баштаганын кабарлады. Маалыматка караганда, ал жердеги комплекстин чатыры жана эшиктери оңдолуп жатат.
АКШдагы эки иликтөө борбору да жандоочтон тартылган сүрөттөрдү көрсөтүп, иш жүрүп жатканын ырастады.
28-февралда АКШ президенти Дональд Трамп менен Түндүк Кореянын лидери Ким Чен Ындын Вьетнамдагы жолугушуусу эч кандай макулдашуусуз жана күтүлгөндөн эрте аяктады.
Былтыр 12-июнда Сингапурда Трамп менен Ким кол койгон документте Вашингтон «коопсуздук кепилдиктерин», ал эми Пхеньян «Корей жарым аралын өзөктүк куралдан толук арылтууга» убада берген.
