Ош-Бишкек трассасынын 67 чакырымын түзгөн Маданият-Жалал-Абад автоунаа жолун реконструкциялоо 2019-жылдын жаз айларынан башталат.
Бул тууралуу транспорт жана жол министринин орун басары Азимкан Жусубалиев парламенттеги “Ата Мекен” фракциясынын Жалал-Абадда өткөн көчмө жыйыны учурунда билдирди.
- Долбоорду аткарууга Евразия өнүктүрүү банкы менен 2014-жылы 72 миллион долларга макулдашылган. Бирок документ жана уюштуруу иштери, долбоорду даярдоого төрт жыл убакыт кетти. Тендерди азербайжандык компания утуп алган. Жумуш жаз айларынан башталат, - деди Жусубалиев.
Жыйын учурунда депутат Алмамбет Шыкмаматов төрт жыл мурда кол коюлган келишимди өкмөт кечиктирип жатканын сынга алды.
2-категориядагы жолго кирген Ош-Бишкек трассасынын бул бөлүгү 11 тонна жүктү көтөрүүгө ылайыкташып курулат. (RsK)
