Мурдагы ички иштер министри Мелис Турганбаев эркин күрөш боюнча спорт ардагерлери арасында өткөн дүйнө чемпионатында коло медалга ээ болду.
Македониянын борбору Скопьеде өткөн мелдеште экс-министр 56-60 жаштагы спортчулар арасында 78 килограммга чейинки салмакта күрөшкө чыккан. Ал алгач орусиялык жана украиналык балбандарды жеңип, жарым финалда франциялык ардагер спортчуга утулуп калды. 3-орун үчүн украиналык Сослан Адырхаев менен күрөшүп, 8:0 эсебинде жеңишке жетип коло медал тагынды.
Мелис Турганбаев буга чейин 2016-жылы Польшада өткөн чемпионатта да коло байгенин ээси болгон.
56 жаштагы Турганбаев 2014-2016-жылдары ички иштер министри болгон.
Эркин күрөш боюнча ардагерлер арасындагы дүйнө чемпионатына Кыргызстандан төрт балбан катышууда.
Бүгүн, 29-сентябрда 46 жаштан 50 жашка чейинкилер арасында Кубан Эркимбеков (70 кг.), Чынарбек Изабеков (100 кг.) жана 51-55 жаштагылар арасында Талант Бегалиев (70 кг.) килемге чыкты. Эркимбеков менен Изабеков алгачкы атаандаштарын жеңип, байге үчүн күч сынашуусун улантууда. Талант Бегалиев жарым чейрек финалда жапониялык Такуми Мориге жеңилди. (BkA)
