Британ маалымат каражаттары жазганына караганда, жекшемби күнү кечинде полиция Prezzo рестораны орун алган районду курчоого алды. Ресторандан уулануу белгилери менен эки киши кайрылган. Бир аял, бир эркек ооруканага жаткырылып, эсине келе баштаганы кабарланды. Ресторандагы кардарлардын бири ууланууга шектелгендер орустар болгонун "Твиттердеги" баракчасына жазды. Бул маалымат боюнча расмий жооп айтыла элек.
Мурдагы тыңчы Сергей Скрипал жана анын кызы “Новичок” химиялык заты менен Солсбери шаарында ууландырылгандан кийин ооруканада бир нече апта жатып чыгышкан. Британия жана анын өнөктөштөрү ууландыруунун артында турганы үчүн Орусия бийлигин күнөөлөгөн, Москва айыптоолорду четке каккан. Британиянын бийлиги Скрипалдарды Орусиянын башкы аскерий чалгын мекемесинин эки агенти ууландырганын жарыялаган.
