2018-жылдын жарым жылында чет жакта жүргөн кыргызстандыктар мекенине 1 млрд. 200 млн. доллардан ашуун каражат которду. Бул өткөн жылдын ушул убактысына караганда 110 млн. долларга көп. Бул тууралуу “Азаттыкка” Улуттук банктын расмий өкүлү Аида Карабаева билдирди.
2017-жылы чет жакта жүргөн кыргызстандыктар мекенине 2 миллиард 482,2 миллион доллар которгон. Кыргызстанга келген бул сумманын 90% Орусияда жүргөн мигранттар жөнөткөн.
Мигранттар Кыргызстанга которгон каражаттын суммасы 2015-жылы 1 млрд. 168 миллион долларды, ал эми 2016-жылы 1 млрд. 991 миллион долларды түзгөн.
Кийинки күндөрү Орусияда, Казакстанда жана Түркияда улуттук валютанын куну түшүп, эмгек мигранттарынын маянасына таасирин тийгизип жатканы айтылган. (КЕ)
