Пакистанда жаңы шайланып келген депутаттар бүгүн парламентте ант берип, расмий ишке киришти. Жаңы парламент бул аптанын соңун утурлай спикерди жана анын орун басарларын шайлайт. Андан соң гана депутаттар жаңы премьер-министрдин талапкерлигине добуш беришет.
25-июлдагы парламенттик шайлоодо оппозициячыл саясатчы, мурдагы крикет оюнчусу Имран Хандын “Техрик-и-Инсаф” партиясы алдыга чыгып, Улуттук ассамблеяда 115 мандат алган. Бирок коалициялык көпчүлүктү түзүш үчүн талап кылынган 137 мандаттык чекти багындыра алган эмес. Ошентсе да Хан коалиция түзүп, өзү премьер-министр болушу үчүн башка депутаттардын арасында жетиштүү колдоо бар экенин айтып жатат.
Шайлоонун жыйынтыгы менен мурдагы премьер-министр Наваз Шарифтин “Пакистан мусулман лигасы” партиясы Улуттук ассамблеядан 64 орун алган. Ал эми мурдагы премьер-министр, маркум Беназир Бхуттонун 29 жаштагы уулу Билавал Бхутто Зардари жетекчилик кылган Пакистан элдик партиясы 43 мандатка ээ болгон.
Шарифтин партиясы добуштар бурмаланганын айтып, иликтөөнү талап кылган болчу.
