Бишкекте өтүп жаткан күрөштүн түрлөрү боюнча Азия чемпионатында кыргызстандык балбандар Жоламан Шаршенбеков жана Урмат Аматов грек-рим күрөшү боюнча финалдык таймаштарда атаандаштарына жеңилип, күмүш байге алышты. Бүгүн, 27-февралда мелдештин алгачкы күнүндө күрөштүн бул түрүнөн беш топтом медал ойнотулуп жатат.
Жоламан Шаршенбеков 55 килограммга чейинки салмакта үч беттеш өткөрдү. Алгач казакстандык Корлан Жаканшаны 14:2 эсебинде жеңсе, жарым финалда кытайлык Лигуо Каону 8:0 эсебинде таза жеңип финалдык таймашка чыкты. Алтын байге үчүн жапониялык Шота Танокура менен таймашып 4:5 эсебинде жеңилип, 2-орунду алды.
Ал эми Урмат Аматов 63 килограммга чейинки салмакта күчүн сынады. Аматов алгач чейрек финалда түштүк кореялык Докйунг Жунгду 1:1 эсебинде жеңип, жарым финалда жапониялык Такойуки Иногичини 8:7 эсебинде утуп чыккан. Финалда ал 2016-жылы Бразилияда өткөн жайкы Олимп оюндарынын коло байгесинин ээси, өзбекстандык Элмурат Тасмурадов менен беттешти. Бул таймашта өзбекстандык балбан 8:0 эсебинде жеңишке жетип, 4-жолу Азия чемпиону аталды.
Жоламан Шаршенбеков өспүрүмдөр (кадеттер) арасында Азия жана дүйнө чемпионаттарында коло байге алган (2016-ж.). Жаштар арасында Азия жана дүйнө чемпионаттарында күмүш медал тагынган (2017-ж).
Урмат Аматов - 2010-жылы өткөн жаштар арасындагы жайкы Олимп оюндарынын чемпиону.
Бүгүн килемге чыккан кыргызстандык балбандардан Эсен Асанов (-77 кг) байгесиз калды. Алдыда Азат Бейшебеков (-87 кг) жана Мурат Рамонов (-130 кг) коло байге үчүн күрөшөт. Аталган балбандар чейрек финалдык таймашта атаандаштарына жеңилип, жооткотуучу таймаштарда жеңишке жеткен эле.
Күрөштүн түрлөрү боюнча Азия чемпионаты Бишкекте 4-мартка чейин уланат. Эртең кыргызстандыктар Каныбек Жолчубеков (60 кг), Роман Царев (67 кг), Акжол Махмудов (72 кг), Атабек Азизбеков (82 кг) жана Үзүр Жусупбеков (97 кг) килемге чыгат. (SDz)
