Орусиянын президенттигине ат салышууга ниеттенип жаткан теле алып баруучу Ксения Собчак саясий дымагы олуттуу жана узак экенин билдирди. Бул тууралуу ал 6-февралда Вашингтондо өткөргөн басма сөз жыйынында айтты.
Эл аралык стратегиялык изилдөө борборунда уюштурулган иш-чарада сүйлөп жатып Собчак АКШ администрациясынын өкүлдөрү менен Вашингтон Орусияга каршы киргизген экономикалык санкцияларды талкуулоону боолголоп жатканын кошумчалады.
Ал ушу тапта эки державанын алакалары абдан начар экенин белгилеп, «Орусия - бул Путин эмес» деп билдирди.
18-мартта өтө турган президенттик шайлоого расмий талапкер катары каттоодон азыркы өлкө башчы Владимир Путин, либерал-демократтардын атынан Владимир Жириновский жана коммунисттердин партиясы көрсөткөн Павел Грудинин өткөн.
Алардан башка ат салышуу ниетин "Яблоко" партиясынын лидери Григорий Явлинский, ишкерлик боюнча акыйкатчы Борис Титов да билдирген.
