Сот тарабынан ири өлчөмдөгү доого жыгылган журналисттер Нарын Айып, Дина Маслова, экс-депутат Чолпон Жакупованы колдоо максатында ачылган электрондук капчыкка бир күндө 7700 сом чогулду. Бул тууралуу “Сөз эркиндигин коргоо” комитетинин өкүлү Адил Турдукулов кабарлады.
Жарандык активисттер "Zanoza.kg" сайтын негиздеген Нарын Айып, Дина Маслова жана “Адилет” укуктук клиникасынын жетекчиси, экс-депутат Чолпон Жакупова үчүн “ЭлСом” электрондук капчыгын 20-декабрда ачышкан. Капчык номуру - 0555 750-882.
Быйыл жазында Башкы прокуратура "Zanoza.kg" сайтына чыккан "айрым материалдар ошол кездеги президент Алмазбек Атамбаевдин ар-намысына шек келтирди" деп сотко жалпысынан 30 миллион сом өндүрүү боюнча беш доо арыз берген.
Анын негизинде райондук, Бишкек шаардык соту жана Жогорку сот прокуратуранын өтүнүчүн канааттандырган.
